Hello everybody
شلونكم يناس مكافحه 💚
انتبهتوا لاسم المدونه ؟ tuqa wanna be better
نهاية هالبوست تفهمون ليش هالاسم
هسا نحجي شلون نطور نفسنه ؟
هالاسولف ملخص محاولاتي مع نفسي لتعلم شيئا ما و شتعلمت منهن ؛
حتى نتعلم شي بشكل مضبوط نحتاج الاستمراريه ، و تعال جيب ترتيب الوقت و الواهس و الايمان و الشركاء و التحفيز و المزاج بس الحياة متنجمع بيهه هالامور كلهه سوه .
اصعبهن هو الايمان ، هالشي يستحق نحاول من جديد ؟ رح يأثر على حياتنه شي ؟ رح يسووي طاقه بداخلنه ؟ يضيف لمسه ولو بسيطه على حياتنه ؟ هاللمسه تستاهل اقاوم المشاعر السلبيه اللي تتكون بعد اخفاق المحاوله ؟
هذي هي الافكار اللي تمنعنه نستمر ، لما نعرف نتعامل وياهه صح رح نگدر نستمر .
هالافكار نفسهه اللي تأثر على المزاج و الواهس .
الوقت سالفته تختلف بين الاشخاص ، ناس تگدر تحط جدول و تلتزم بي ، و بالعافيه عليهم هالطبع المفيد.
و اكو ناس متحب تلتزم بجدول معين لمهام اليوم و اني من هالنوع ، ف نترك الترتيب يكون يوم بيومه و اختيار الاولويات يكون لحظي .
من نختار اولوياتنه صح ، رح نگدر نستمر نقرر الاهم فالمهم ، و الضروري و القابل للتأجيل .
تقنية القرار حسب هالتصنيف بهواي نواحي حياتيه كلش مؤثره على راحة و انتاجية الشخص 💚 .
البؤس ممكن يدخل حياتنه بأي بقعه بالارض كنا عايشين ، نصير نحتاج طاقه تحيينا من الداخل بمختلف مصادرهه ، هرمونات سعاده ( سيروتونين دوبامين اندروفين اوكستوسين ) او امور ماديه و معنويه .
باعتباري عايشه بالوطن العربي فهواي حاجات مخروبه ببلدي ، بس اشوف حتى اللي عايشين بدول متقدمه يمرون بشي اسمه بؤس و مختلف درجات الكآبه .
ف اللي نسووي نعلم نفسنه انه اللي بيدنه يتحسن نشتغل عليه ، و اللي مو بيدنه تغيره نتقبله ، مره نضوج مره نحزن مره نبجي مره نحلم ، مرورنه بهالسلسله و التعامل مع نفسنه بكل مره بشكل صحيح رح يخلينه نگدر ننتج و نقدم الكثير لنفسنه و للاخرين .
تفاصيل هالامور تندرس بالذكاء العاطفي و مختلف فروع ال mental health .
صح ماكو منهج تعليم مدرسي و جامعي مفيد يخرجنه مهيئين mentally و لا كل العوائل مؤهله تنشىء انسان مهيء للعيش .
فالحل نعلم نفسنه بنفسنه 💚 .
تحدي 29 يوم وي @the.murt گدرت استمر بي و اكمله لما تعاملت وي هالنقاط صح ، اللي قدمه اليه هالتحدي هو التحفيز و المشاركه ، و اني اشتغلت على باقي النقاط بحيث وصلت حاليا لمستوى انه تعلم الانكليزي هو اللي يحسن المزاج و يفيدني معنويا بدل لا احتاج اوفر النقاط كلهه حتى استمر .
الصور اللي رح ادرجهم تمثل قائمة امور اريد اطور نفسي بيهن ، و لاحظوا التواريخ ، بمرور هالسنين و المحاولات وصلت للي گدرت اسووي بهالتحدي ✨
و هذا الحچي الفوگ كله سبب تسمية مدونتي ، انه اتعلم اصير احسن و احسن هو احسن شي ممكن اخلي غاية حياتي ، لانه شيء لا ينتهي و ماله حدود 💚 .
. I won't stop learning ✨
كلامك جميل وفيه روح تريد انتزاع الكسل للارتقاء والتطوير .. ترتيبك حل بالنهاية وجميل التزامك بده يحركني شويه لان اني من النوع المااحب التزم او انظم وقتي المدري وين يروح (>.<)
ReplyDeleteTy <3