مرحبا
وصلنه اليوم ال 20 من التحدي ، صار عشرين يوم احاول اتغلب عالبؤس البداخلي و اگوم اسوي الشي اللي مقرره انجز تقدم بي خلال هالتحدي و هو تعلم اللغه الانكليزيه
هذا جان هدفي ببداية التحدي و ما زال و البؤس طبعا في تزايد و جاي امر باشياء مؤلمه جدا فصدگ صار تحدي حقيقي
حاليا وصلت مرحله انه ميكتمل يومي اذا ما اروح ادرس انكليزي ، و صار مصدر فرحه اليه لما اتغلب على السلبيه بداخلي و اروح افتح فيديو و اشوفه و احل الاختبارات بالتطبيق اللي مستخدمته من بداية ا التحدي
بذلت جهد بمقاومة البؤس اكثر مما بدراسة الانكليزي لانه هو العائق اما التعلم فهو ممتع و ينطي طاقه اكثر مما ياخذ جهد مني ، راضيه و فخوره بالانجاز اللي حققته بتغلبي ع السلبيه و احراز تقدم لو جنت وحدي بلا هالتحدي لو احققه هالسنه لو لا
اللي تعلمته بهالتحدي انه كل محاوله تبدي صغيره و بانجاز تافه و تكبر شوي شوي ، و تكرار المحاوله على مدى اسبوعين كافي لجعل دماغك يحب هالشي و يگوم يذكرك برغبتك هو ، و ايضا عرفت انه اني بحاجة شخص ينتبه لانجازي و يتابع ، شعور وجود شخص مهتم لتقدمك يخليك تستمر تحاول و ايضا المشاركه مع الجماعه تحفز كلش ، شكم مره ردت ابطل و ما اسوي استمارات المتابعه او بوستات المدونه لكن ما اريد ابقى وحدي احاول ، ربما التحدي مالتي المفروض جان اعنونه التغلب على البؤس و السلبيه لانجاز شيء ما بس سميته عالانكليزي لان هو الشي اللي ارد اتعلمه .
لگيت نفسي حاليا مسويه هالانجاز بالتغلب على السلبيه و مجنت متوقعته يكون بهالحجم و همين گام دماغي من يمه يگلب انكليزي من افكر او اسولف و يشمرلي الكلمات تلقائيا و اللي اسعدني اكثر هو گمت اردد عبارات بالانكليزي گدام الاخرين و بكل ثقه
رح ابقى بالايام ال 10 الباقيه احاول و حتى لما نخلص التحدي استمر وحدي و باقي هدفي نفسه اتقدم بدراسة الانكليزي و اتغلب على السلبيه و البؤس
هدفي كتطور لغه اكمل الكورس اللي حاليا اني بي، الصوتيات و القواعد و بلكت اگدر ادري كورس جديد بدال كورس الاستماع اللي ختمته خلال التحدي
اتمنى ابقى قادره اتغلب ع البؤس و المشاعر السلبيه بداخلي و اگوم اتعلم رغم الظرف المؤلم اللي جاي امر بي هالايام بالذات
Comments
Post a Comment